Tjips! Hier kom die taalpolisie

LESERS loop rond met prentjies in hul kop van mense wat hulle nog nooit ontmoet het nie. So spook wyle L.W. Hiemstra helder oordag by my. Soms argumenteer ek met die oubaas, kompleet met handgebare en heftige kopskud, soos ’n verslonste vrou met ’n hoë blos wat ’n winkeltrollie vol leë plastieksakke rondstoot.

Kunstenaars gebruik media. ’n Medium is ’n materiaal of middel waardeur mense hulle uitdruk. Beeldhouers gebruik byvoorbeeld klei, hout, klip, gips, metaal, skroot. Skilders gebruik verf en soms foefies soos kos of hul maandstondebloed.

Skrywers gebruik taal. Dis ’n palet so wyd soos die Heer se genade. Én koud is die windjie en skraal, want dis ’n vlakte vol heinings en doringdraad...