Leonard Cohen: Die man wat sy sogenaamde muse emosioneel mishandel het. Of het hy?

PRESIES 50 jaar gelede, op die ouderdom van sewe, het ek vir die eerste keer na Leonard Cohen se “So Long, Marianne” geluister. Ek was vir spraakklasse by die akteur en drama-onderwyser Babs Laker, verbonde aan die Akademie vir Dramakuns (ADK) in Kloofstraat, Kaapstad.

Op ’n dag besluit sy om vir my hierdie lied op ’n ou kassetspeler te speel. Hoekom sy gedink het ’n kind van sewe met ’n haasbekkie sou enigsins aanklank vind by dié mistroostige sangnommer weet ek nie, maar ek het.

Daar was iets poëties, nostalgies, ’n hunkering, in die lirieke, die melodie, en die man se hartseer stem. Toe ek ouer word, het ek herhaaldelik na hom, Bob Dylan, Bruce Springsteen, Johnny Cash en vele ander in losweg dieselfde tipe donker genre geluister...