Kyk, dis pienk pods in the sky with diamonds!

DIE eerste keer toe ek die pienk Lego-blokkiesgebou vanuit Langstraat raaksien, dog ek dis ’n stel vir ’n advertensie wat verfilm word. Eers toe ek naderstap, sien ek dis ’n permanente gebou en die pienk perdestalletjies in die lug is balkonne. Ek het dadelik besef die kinders wat PlayStation gespeel het, bou nou geboue. Ek bel een van my argiteksvriende, John Edwards, om uit te vind wie en wat agter dié vars ontwerp sit. Hy sê dis die Uxolo-woonstelle, wat hy noem die psychedelic-PoMo-pink-patterned-a-partments en “die beste ding wat tot dusver uit Covid gekom het”.

Die historiese Langstraat is sleg geknou deur die pandemie toe baie besighede moes toemaak. Daarom is die Uxolo ’n groot aanwins daar waar hy in een van die systraatjies staan. Twee skoolmaats is verantwoordelik vir hierdie aandagtrekker: die 33-jarige André Krige en Theo Kruger wat mekaar van hul Voortrekker-dae af in Linden, Johannesburg, ken. Later het hulle paaie in Bloemfontein gekruis toe hulle saam daar argitektuur studeer het en vandag is hulle aan die hoof van Two Five Five Architects.

Hulle vertel my die naam Uxolo is Xhosa vir “vrede" of “welwillendheid” en dis ’n kopknik na Vredenburg-steeg waarin die gebou staan. Hierdie eerste voltooide residensiële ontwikkeling van mikro-eenhede in die Kaapstadse sakekern bestaan uit 35 residensiële eenhede van tussen 24m² en 40m², sowel as ’n voorportaal en kleinhandel-area op die grondvloer. Die hele erf is net 195.5m²...