POLITIEKE NOTABOEK | Cyril droom van oranje oorpakke

JY hoef nie ’n Katoliek of selfs ’n Christen te wees om die geestelike leier van meer as 2 biljoen mense, pous Francis, ’n bietjie te bewonder nie. (Het jy geweet hy is ’n Argentyn en sy regte naam is Jorge Mario Bergoglio?) Hy het meer as enige pous die laaste klompie dekades weggebreek van Roomse ortodoksie met ’n klem op menseregte, vrede en naastediens.

Vir my het die oubaas dié week regtig méns geword. Ek koop dit nie dat enigiemand dagin en daguit net vol liefde, goedheid en verdraagsaamheid kan wees nie. En toe sien ek hoe ’n vrou hom aan die hand gryp en amper van balans af trek. Het hy haar hand gesoen en haar geseën? Nee, die Jorge in Francis het vir ’n oomblik oorgeneem. Hy het haar op die hand geklap en weggeruk.

Natuurlik is dit nie goed genoeg nie, hy is immers die pous en vaar gereeld teen geweld teen vroue uit. Maar met sy eerste openbare verskyning daarna het hy berou uitgespreek en om verskoning gevra vir sy swak gedrag. “Ons almal raak soms ongeduldig,” het hy gesê. Dis waar, oom...