(Hoe) moet ek my pa verkwalik?

DIE afgelope week gesels ek met ’n oudkollega. Hy was in die vroeë 90’s ’n aktiewe lid van die UDF en het my deurlopend by hulle aktiwiteite betrek. Ek was nie ’n struggle-aktivis nie, maar het goed met die onderliggende saak geïdentifiseer. Ná ons gesprek hierdie week het ’n hele paar herinneringe uit daardie periode weer in my kop opgeduik.

Ons het destyds byna weekliks huisvergaderings gehou met baie van die bekende geeste uit die struggle as gaste. Mense soos Willie Hofmeyr, Carl Niehaus, die twee Verwoerds, Kader Asmal, Peter Mokaba, progressiewe akademici en ander. Die lys is lank. Ons het ook “gemarch” en ’n petisie teen die apartheidmoordbendes by die parlement gaan oorhandig. En op ’n keer het ons vir FW by ’n NP-vergadering gaan koggel en hom oor die moordbendes in ’n hoek probeer druk – sonder veel sukses.

Die tema van ons gesprek hierdie week was egter iets anders, naamlik politieke korrektheid onder sommige mense vandag. Mense wat nou baie ongenuanseerd vinger wys asof almal ewe ingelig en ewe boos was. Die groot vraag wat nou opduik, is hoe moet apartheidsondersteuners vandag beoordeel word en hoeveel drif is geregverdig? Dit is ’n gevaarlike onderwerp en kan maklik gesien word as ’n inleiding tot verontskuldiging of veroordeling...