Van Pramberg na Tietiesbaai – ’n ontboeseming oor borste

TIETIES. So ’n skadelose klein woordjie. Maar dié skadelose klein woordjie het die afgelope week soveel skade aangerig en so ’n herrie laat losbars op die sosiale media nadat dit in ’n artikel in Rapport gebruik is, dat ek met nuwe ontsag daarna kyk.

Wanneer ek met die rugbyskrywer Louis de Villiers, die gebruiker van die woord, gesels, is sy bekende rasperstem ’n snars meer skor as gewoonlik. Want hy sit midde-in ’n moerse mediastorm weens sy gebruik van die T-woord in ’n storie.

In ’n artikel oor hoe vervelig plaaslike rugby vir hom geword het, het hy dit vergelyk met ’n televisiereeks. Met sy tong in die kies skryf hy toe dat rugby tans so teleurstellend is soos Game of Thrones se laaste twee seisoene, net “sonder drake, tieties of towery”. Die gewraakte woord vind haar pad toe in ’n kop in, en voor jy jou kom kry, het die cancel culture-taakspan hul tieties in ’n knoop...