Die president en die voormalige spioenbaas: feit, fiksie of fantasie?

AS die voormalige spioenbaas en nou selfontwerpte “fluitjieblaser” Arthur Joseph Peter Fraser reg is, was Cyril Ramaphosa deel van ’n misdadige onderneming binne die presidensie wat groot hoeveelhede buitelandse valuta die land binnegesmokkel het. Hulle het die Amerikaanse dollars daarna deur verdagte sakelui laat was, waarskynlik om dit wettig te laat lyk.

Die president het volgens Fraser gelieg toe hy gesê het die geld wat in Februarie 2020 van sy Phala Phala-plaas in Limpopo gesteel is, was die opbrengs van vee- of wildverkope. Die geld kom van lande soos Katar en Egipte en is deur Ramaphosa se spesiale raadgewer, Bejani Chauke, Suid-Afrika binnegesmokkel. Hy het die geld verpak en in die rusbank versteek en die buit met die hulp van genl.maj. Wally Rhoode, hoof van die presidensiële beskermingseenheid, na Phala Phala verskuif.

Fraser se groot komplot is vervat in ’n memorandum of brief van 14 bladsye wat hy geskryf het aan brig. Zama Basi, hoof van die Valke se teenkorrupsietaakspan en die polisieman wat die ondersoek na die diefstal van die geld by Phala-Phaha lei...