TREINRY ontketen 'n dosis nostalgie en weemoed by die meeste van ons. Miskien is dit omdat treinry tydloos is.

Elektriese of diesellokomotiewe het nou wel stoomlokomotiewe vervang, sinjale word elektronies beheer en klein stasies langs die spoor het verdwyn, maar die wiele klik-klak nog steeds onder jou, die remme skreeu, die waens wieg saggies van bakboord na stuurboord en by stasies klop spoorwegmanne met hamers teen die wiele.

'n Langafstandtrein is 'n droom wat deur 'n ewigheid van tyd en spasie dryf; jou kompartement 'n kokon en jy 'n papie wat ver verwyder is van die wêreld daar buite...