Jou DNS string tot anderkant Pluto

BILL BRYSON is ’n fenomeen. Sy niefiksieboeke is propvol feite en inligting, so onweerstaanbaar opgedis dat dit topverkopers word. As hulle ’n bot kon programmeer om feite te verslind en so onderhoudend soos Bryson tot ’n samehangende geheel te verweef, sou ek in KI glo.

Hy is in Amerika gebore, maar woon in Engeland. Sy grootste treffers was ’n boek oor Engeland, Notes from a Small Island, en A Short History of Nearly Everything wat die Aventis- en Descartes-pryse gewen het en die grootste niefiksieverkoper van die dekade in die Verenigde Koninkryk was.

Sy brein is ruim en omvattend en hy is ongeneeslik nuuskierig oor alles onder die son. Nou het hy ’n lywige boek oor die menslike liggaam geskryf – weer eens ’n topverkoper. Die uitgawe wat op my lessenaar beland het, is hardeband, volkleur, met fassinerende mikrofoto’s van selle, senuwees, parasiete en allerlei komponente van die menslike lyf, asook lynsketse uit dr. Henry Gray se beroemde anatomiehandboek en foto’s van Middeleeuse skilderye...