Die dag toe Paul Roos sy alie gesien het teen Boland Landbou

DIT is 06:30 op koelerige Saterdag. Ek spring uit die bed; ’n man op ’n missie. Ek maak koffie vir die slapendes en jaag almal aan, want 07:20 gaan die wiele rol by Boland Landbou.

Die Hoër Landbouskool Boland het vroeër jare so 70 seuns per graad gehad, totdat nog ’n graad 8-koshuis verlede jaar op die plaaskampus tussen Wellington en die Paarl voltooi is. Daar is nou 400 seuns. En almal bly in die koshuis.

So nou en dan is daar ’n ouer of twee wat moet inry skool toe om sy/haar seun te gaan haal as hy vir ’n ruk uit die koshuis geskors word omdat daar miskien ’n “vape” of sigarette iewers onder die vuil klere in ’n kamerkas ontdek is of ’n ander kattekwaad aangevang is, maar dit gebeur maar min...