Die staatsgreep-spook lóóp

TENSY iets dramaties verander, gáán die ANC minder as 50% van die stemme in 2024 trek, soos reeds met die laaste plaaslike verkiesings gebeur het. Alle aanduidings is dat die party se kurwe afwaarts neig.

’n ANC-nederlaag is tegelykertyd ’n bron van hoop en kommer. Hoop omdat dit vir waarskynlik die meeste denkende kiesers duidelik geword het dat die party nie in staat is om homself te suiwer en te hernu nie en dat die spiraal van wanbestuur en korrupsie gaan voortduur, so ’n koalisieregering kan kwalik slegter vaar. Kommer omdat ’n ANC-nederlaag groot onstabiliteit kan meebring – selfs ’n staatsgreep.

Die vrees dat die ANC, soos Zanu-PF in Zimbabwe, die wil van die mense sal ignoreer en aan die mag gaan vasklou, is deels gesetel in ’n Afro-pessimisme wat altyd die slegste in die vasteland raaksien, en deels in die ANC se rekord van arrogansie en magsbeheptheid...