Verduistering: Fase 6. Gatvolfaktor: Fase 8. En nou?

FEIT: As die president en sy kabinet die verlammende beurtkrag aan eie bas ervaar het soos die res van die burgery en veral die sakegemeenskap, eerder as om in bevoorregte borrels sonder kragonderbrekings te leef, sou ons nie in September 2022 nog met elektrisiteitsprobleme gesit het nie.

Die ministers lees en hoor bloot van beurtkrag, hulle voel nooit jou en my uiterste frustrasie met ses of agt uur sonder krag elke dag nie; hulle sien nooit die trane en desperaatheid van klein en mediummaatskappye wat hulle winste in die sand sien wegsypel nie; hulle dink waarskynlik nie eens aan die hoërskoolleerlinge en studente wat by kerslig en sonder rekenaars of tablette moet studeer nie.

Nog ’n feit: Die Eskom-krisis is ’n momentopname, ’n kiekie, van die krankhede en skeurlyne van die regerende ANC, en Cyril Ramaphosa se verstommende magteloosheid om sy party reg te ruk...