Politieke Notaboek | Zuma se vaatjie vol uitvaagsels

AS Hillary Clinton se gewraakte tipering van Donald Trump-groupies as ’n “basket of deplorables” ooit in Suid-Afrika van toepassing was, is dit op die Jacob Zuma-trawante in die Pietermaritzburgse hooggeregshof dié week waar hy probeer om ’n joernalis en ’n staatsaanklaer privaat te vervolg.

Bo-op dié vaatjie vol uitvaagsels is die man wat ’n halfmiljoen rand gedeponeer het om die saak moontlik te maak, die omstrede diamantsmous en aartsrassis Louis Liebenberg.

Maar neffens hom lê Carl Niehaus en die Zuma-stigting se Mzwanele Manyi, wat albei hulle foonkameras in Karyn Maughan en Billy Downer se gesigte gaan druk het waar hulle in die beskuldigdebank met hulle prokureur beraadslaag het. Hulle het dit agterna met groot leedvermaak op sosiale media geplaas om by die koor van vloekers aan te sluit...