Laat die land weer lig sien, een gemeenskap op ’n slag

DAAR is nie veel beter voorbeelde as die Mafube- plaaslike munisipaliteit in die Vrystaat van die verval van plaaslike regering in die land nie. Inwoners van die dorpies onder dié munisipaliteit se bestuur, plekke soos Frankfort en Villiers, moes maar net oor die jare gewoond raak aan al die gewone gevolge van korrupte, onbekwame en selfdienende munisipale bestuur: alles is stukkend, vuil of gesteel. ’n Vorige munisipale bestuurder het letterlik miljoene in sy eie sakke gestop deur korrupte tenders toe te ken.

Maar daar is een ding wat wel werk in Mafube, en dit is elektrisiteit. Die rede hiervoor is dat ’n privaat maatskappy met die beskeie naam Rural Maintenance in 2012 alle elektrisiteitsverwante dienste en instandhouding in Mafube oorgeneem het. En Rural Maintenance (https://www.ruralmaintenance.co.za/) het sedertdien ’n hele klomp idees oor elektrisiteitsvoorsiening op die kop gekeer, soos dat gewone mense nie bereid is om te betaal vir wat hulle kry nie, en daarmee saam dat munisipale dienste nie doeltreffend én winsgewend gelewer kan word nie.

Die gevolg (https://www.ruralfreestate.co.za/post/the-case-study-mafube-local-municipality) is dat die munisipaliteit nou ’n gereelde inkomste van Rural Maintenance ontvang, dat meer as R120 miljoen al bestee is om die netwerk-infrastruktuur uit te bou, en dat tariefverhogings gemiddeld minder is as wat Nersa toelaat. Inwoners is tevrede met die dienste wat aan hulle gelewer word en is daarom bereid om daarvoor te betaal. Selfs Eskom vind baat: Rural Maintenance het sedert 2012 meer as R700 miljoen aan die nasionale kragvoorsiener oorbetaal vir elektrisiteit wat aan inwoners aanverkoop is. Rural Maintenance het boonop plaaslike ondernemings gehelp om meer as 4 MW se hernubare krag te kan opwek...