Suid-Afrikaanse uitskieter-satelliet skuur skouers met SpaceX

EK sit in ’n gogelgreep voor die rekenaarskerm. Asof ek na ’n fliek kyk. ’n Ruimte-eeu-lokettreffer. Al die elemente is daar. Die blou koepel bo Cape Canaveral, Florida. ’n Ronde lanseerblad, die kersregop SpaceX Falcon 9-vuurpyl in die middel. Die enorme staalstruktuur wat die vaartuig stut. Vloeibare suurstof wat wit draakasem tussen die verskillende koppelings van die vuurpyl sluier. Selfs die nasale stemme wat afgemete frases oor die eter stuur, herinner aan 2001: A Space Odyssey. Maar hierdie is geen fantasie nie. Dis die YouTube-stroom van sekerlik dié vuurwerk van hierdie nuwe jaar.

… drie … twee … een …

SpaceX Falcon 9 se Transporter 6 lanseer skouspelagtig bo brisante bollings. Hoër skiet die spigtige pyl, kleiner strek die strook aarde doer onder. Kommentatorverduidelikings van wentelbaan, maksimum aërodinamiese druk, hoofenjin-afskakel en nege enjins se stadia-skeiding volg. Ek sukkel om alles in te neem; emosie hardloop hoendervel oor my. Aan boord van hierdie epiese sending is 114 satelliete van oor die hele wêreld. Nommer 114 is uit eie bodem...