’n Eeu van die manjifieke Paula Fox

PAULA FOX, wat op 22 April 2023 ’n eeu gelede gebore is, sou as kinderboekskrywer onthou gewees het, was dit nie vir die herlewing van haar roman Desperate Characters (1970) in die laat-1990’s nie. Die eerste van haar twee memoires oor haar verstommende lewe, Borrowed Finery, is ook in dié tydperk van hernude belangstelling in haar werk, in 2001, gepubliseer.

Haar roman-meesterwerk, Desperate Characters, was aanvanklik ’n swak verkoper en vir langer as 10 jaar uit druk, maar het ’n uitgewersensasie geword nadat Jonathan Franzen in Harper’s die boek aangeprys het as “obviously superior” bo Updike, Roth en Bellow. ’n Nuwe geslag skrywers, soos Sigrid Nunez en David Foster Wallace, het in dié tyd hul skatpligtigheid teenoor Fox erken.

Ná haar dood in 2017, op 93-jarige ouderdom, is Fox gehuldig vir haar ses romans, twee memoires en ook 20 kinderboeke. Laasgenoemde bied meestal ’n kind se perspektief op wegraping uit ’n vertroude omgewing. Bykans 45 jaar ná Desperate Characters se aanvanklike publikasie, en 25 jaar ná die herlewing, is hierdie misterieuse en glashelder boek met ’n bladsy-omvang van minder as 200 steeds onuitputbaar ryk en eietyds. ..