Kyk of jy vir my die son kan vang (en oor 36 maande terugbetaal)

AS jy soos ek eers ’n paar oomblikke moet nadink om te onthou waar in ’n kragprop die L-, E- en N-drade gekonnekteer moet word, moet jy dit ernstig oorweeg om jou sonkrag-tuisprojek heeltemal aan professionele mense oor te laat. Maar selfs dan moet jy weet waarna jy soek en watter vrae om te vra, en dít verg reeds heelwat navorsing.

Dis 'n relatief nuwe bedryf en gevolglik is daar heelwat kansvatters daar buite, en ’n verkeerde keuse kan jou baie geld kos (en áánhou kos). Soos altyd is die oënskynlik goedkoopste opsie dikwels die duurste een.

Dis nogal nuttig om aan jou blyplek as ’n Eskom in die kleine te dink. Jy wil byvoorbeeld nie tienduisende of selfs honderdduisende rande bestee net om jou eie weergawe van Medupi op die dak te hê nie. En as jy op die tweede verdieping van ’n woonstelgebou bly, of as jou blyplek se dak vir groot dele van die dag in die skaduwee van groot bome of hoë geboue is, is jou opsies met sonkrag natuurlik baie beperk...