’N PAAR weke gelede stuur ek ’n bekommerde WhatsApp aan die man wat woon langs ’n vriendin van ’n vriendin. Sy antwoord nie haar foon nie. Sy woon alleen en dinge is al weke lank op die afdraandepad.

Eers het haar tong gesleep wanneer sy praat. Sy het my vertel van sameswerings teen haar, mense wat van haar steel. ’n Week later babbel sy hoog en vinnig en aanmekaar as ons gesels. Toe raak sy stil. Sy antwoord nie meer haar foon nie.

Dit het alles begin met haar dokter wat vir haar ’n benso vir angs voorgeskryf het. “Benzo” is een van die straatname vir bensodiasepiene, ’n familie van medisynes wat hoofsaaklik vir angs en slapeloosheid voorgeskryf word...