Ed Suter help jou anders kyk

“DIT het alles op ’n parkeerterrein in Epping gebeur toe ek ’n helderkleurige wegneemspyskaart afgeneem het. Dis interessant hoe die onwaarskynlikste ding die weerligstraal kan veroorsaak. Wat ek gesien het, was helder, uniek en het ’n storie vertel. Vandag sal ons dit ‘outentiek’ noem. Sonder dat ek dit geweet het, het daardie foto’s my manier van kyk verander.”

Ed Suter het hierna bekend geword as fotograaf – veral vir straatfotografie – en het vir van modetydskrifte tot internasionale publikasies soos National Geographic gewerk. Hy is ’n briljante stilis, het ’n instinktiewe oog en aanvoeling vir die dramatiese kleure, teenstrydighede en landskappe van Afrika – stedelik sowel as landelik.

Die eerste keer wat ek Ed ontmoet het, was in 2004 by die Groentemarkplein in Kaapstad waar hy besig was om impromptu-foto’s vir ’n artikel oor straatstyl te neem. Die strate het gewemel van mense in kleurvolle Vlisco-broeke, lang rokke, tulbande in allerhande patrone en stringe juwele uit Afrika...