Punkrocker Patti handhaaf ’n balans tussen vrees en vreugde

OM goedkeuring vir jou “guilty pleasure” te kry by een van jou rolmodelle is ’n verligting. Die punkrocker Patti Smith het uit nood op Instagram beland en het meer as miljoen volgelinge. Die Amerikaanse sanger, skrywer, digter en skilder is deur haar dogter gewaarsku dat mense onder haar naam Instagram-profiele skep en as’t ware haar identiteit steel.

“Ek het vir Jesse gevra wat ek daaraan kan doen,” vertel Smith (75) in ’n onderhoud met The Guardian. “ ‘Al wat jy moet doen, is om ’n foto te kies en dan ’n boodskappie vir die mense te skryf,’ het sy gesê.”

Sedertdien gebruik sy dit as ’n “force for good”. Onder haar profielfoto noem sy haarself net ’n skrywer. Haar Instagram-motto is “We are all alive together”. Sy sê Instagram hou haar in voeling met die samelewing (my verskoning ook)...