Die pad van kerriemaalvleis tot Pad Kra Pao

MY kerriemaalvleis smaak nie soos my ma s’n nie.

Ek is nie seker wat die probleem is nie. Ek het deur die jare op verskillende plekke al baie variasies en kombinasies probeer. Ek het byvoorbeeld gedink dat daai blikkie gemengde groente met wortel, ertjies en aartappelblokkies dalk die geheim is. Het dit probeer. Dit was nie die geheim nie. Of die Cartwrights-kerriepoeier? Het dit ook probeer. Maar nee.

Dit wil net nie smaak soos my kinderdae se kerriemaalvleis wat ons saam met Tastic-rys geëet het nie, met blatjang, rosyntjies, piesangskyfies en klappervlokkies. Kerriemaalvleis wat ons ook in vetkoeke gestop het, of in jaffels. O, jaffels! Wanneer laas het ek ’n jaffel geëet?..