’n Eetfees met twee bestanddele

DIE komediant Casper de Vries het ’n wonderlike stukkie vertel oor mense wat stil spog met die woordjie “mos”.

“Ek was mos laas maand in Spanje.” “Toe ek en Cyril mos laas Woensdag op die gholfbaan loop, toe sê hy vir my, hy sê ...” Jy kry die idee.

Nou was ek mos laas naweek gou in die buiteland. Saam met my suster en ’n handvol mans gaan rondrits. Ek is nie een wat die vreemde in ’n groep aandurf nie, maar dié keer was dit ’n onontbeerlike deel van die reis. Dit was wonderlik: Ek het pragtige plekke gesien, interessante mense ontmoet en ongewone kos geëet. En les bes gereis met ’n aardige vervoermiddel...