Bruin jeug duld nie langer hul swart broers en susters se rassisme nie

SY'T ’n foto van haar seuntjie geplaas, sy gesig agter ’n masker verberg, nie eens ’n oog steek uit nie. “My bandiet raak nou next level kiembestand," spot sy. Oepsie! Stadig met die b-woord, word sy terstond vermaan, kompleet met veelseggende ellips: Slegte konneksies met die verlede ...

Die ma is deur elke woordeboek in haar huis. Sy is verward. Beangs, selfs. Het sy êrens ’n rassekonnotasie met die benaming “bandiet” gemis? Is die “b-woord” in Suid-Afrikaanse speak dan tog maar net nog ’n naam vir die k-woord? In haar kop leef immers die herinneringe aan gevangenes van alle kleure en kulture wat in hul bure se tuin werk. As sy meen “bandiet” verwys na ’n bepaalde ras, ter uitsluiting van wit mense, het sý ’n probleem, wys die bandiet se ma toe haar kwaadprater tereg.

Sien, haal ’n oudkollega later dié voorvalletjie op, gee ’n ding ’n naam, al is dit nou ook iets so simpel soos “b-woord”, en jy druk dalk die skalpel in nog ’n sweer van die verlede in. Soos in: If we name it, we can shame it. Om te praat oor die onnoembare. Oor die slegte “konneksies” met die verlede wat al hoe meer soos ’n sweer oor sosiale media uitbloei...