Klip in die bos | Gooi die handdoek van verstokte idees in

’n MENS kan natuurlik nie fisies jou voorouers opnuut kies soos Max du Preez sou wou wens nie, maar sy idee om dit vir jouself in privaatheid te doen, het meriete. Dit is erg genoeg dat voorsate se sondes van talle geslagte terug jou lewenslank materieel op ’n sosiale vlak bly teister.

Maar niks keer ’n mens om jouself geestelik van hulle bose gedoentes te onterf in ’n tipe kanselleerkultuur in trurat nie. Bevry van ouers, oumas, oupas en grootjies se uitgediende sieninge hoef jy ten minste nie meer jou kop daaroor te breek nie. Met die goeie dinge wat hulle gedoen het, kan jy jouself egter vereenselwig. Jou nageslag gaan hopelik dieselfde met jou doen.

Die verskeie redes waarom familiebande, en by ekstensie geloof, so ’n sterk rol in die meeste kulture speel, ontneem mens nie van die vryheid om eie beginsels te kies nie. Sou jy een van die drie Abrahamitiese gelowe bely en benewens jou aardse pa, ook ’n geestelike pa het om mee rekening te hou, is die verdere vraag waarom jy verplig is om dinge wat aan sy gewaande onverdraagsaamheid toegeskryf word, goed te moet vind as jy nie daarmee saamstem nie...