Ek wil my eie baas wees …

NIE ek of Magriet, my vrou en sakevennoot, het tussen winkelrakke grootgeword nie. Ons het nie ’n druppel Indiese, Joodse, Griekse of Arabiese bloed in ons are nie. Geen kennis en wysheid oor kontantvloei, voorraadvlakke, winsmarges of krediet is oor generasies oorgedra nie.

My pa was ’n dominee en haar pa ’n siviele ingenieur. In my familie is handelaars gesien as meer “wêreldse” mense as byvoorbeeld staatsamptenare, onderwysers en predikante. ’n Lustige koop-en-verkopery is as net ’n bietjie beter as ’n bose gedobbel beskou. As kind het ek selfs gesukkel om vir die mense by wie ek koerante afgelewer het die intekengeld te vra. Sonde en afvalligheid was vriende van geld.

Boonop het ek en Magriet elkeen ’n BA-graad met vakke omtrent so relevant tot die handelswêreld as wat balletskoene op ’n beesplaas  nuttig is. Filosofie. Dramakunde. Engels...