EK was baie lank ’n bachelor, so ek het altyd geweet hoe om vir myself kos te maak. Varktjops in ’n pan. Sagte, klam roereier (my maat Jacques se raad was om botter by te sit) met gerookte salm. Boeliebief en kool. Mieliepap en wors. Smoorsnoek met rys. En dit was omtrent my hele repertoire. O, en braai.

Maar die laaste paar jaar het ek al hoe meer die behoefte gehad om lekkereet-kos te maak, eerder as net maagvolmaak-kos. En ek wou my vrou se idee dat ek ’n tipiese Boerepatriarg is wat glo mans hoort nie in die kombuis nie, vals bewys.

Ek begin toe sonder hulp (of medewete) van my vrou ’n paar disse aanpak wat ek self graag sou wou eet en weet my gesin sou ook geniet. En dit is toe nie so kompleks as wat ek gevrees het nie...