Die dag toe Blydskap haar klere moes uittrek

DIE probleem voorhande was om genoeg kaal mense vir die projek te kry. Maar waar kry mens dié? En verkieslik oueres, met plooie en riwwe, gravitasielelle oral?

Dis maklik genoeg as jy op die regte plekke kan soek. Holland of Duitsland, byvoorbeeld. Swede, daar rond. Hoe verder noord, hoe makliker laat val mense hulle klere. Maar Griekeland? Jy sou dink: kaal strande en vervelige Europeërs, deurskynend pienk of horingdroog bruin gekaramelliseer in die son. Maar dit was Oktober, die strande leeg, en die mense buitendien konserwatief.

Die versoek het gekom van Andries Gouws; hy sou ’n skilderwerkwinkel by ons kom aanbied. Die tema was “Gesig en figuur”, en dié sou afgeteken word van modelle in die ateljee...