Breakfast At Tiffany’s in Bronberghof

OUMA sit net gou haar lippe op, was die sin wat vir Anna Ziezanna Dirktiena Briedé gewoonlik ’n ekstra vyf minute kon koop. Met lippe het my ouma bedoel haar Revlon-lipstiffie.

Die grimeer-ritueel het só verloop: Eers is die rooisel op haar dunnerige lippies aangebring. Die lippe is styf teenmekaar gedruk sodat die bolip en onderlip twee egalige pienk roosblare kon vorm. Intense rooipienk lippe waarvoor mens omtrent ’n lisensie nodig gehad het. Gereed vir inkopies in Esselenstraat in Sunnyside.

Anna se gesig is gespons met ’n dun lagie outydse poeier wat haar omtower het tot ’n visuele bekoorlikheid. Dit was die soort skoonheid waarin Pretoria en Hollywood net duskant Leeubrug ontmoet. Ek het altyd vermoed dat Ouma heel moontlik geïnspireer is deur Audrey Hepburn se Revlon-lipstiffie met die naam Pink In The Afternoon. Dit was die ene Breakfast At Tiffany's in Bronberghof...

Deel