Totsiens, kampvegter Serena, ons gaan jou mis

DAAR is ’n onvergeetlike oomblik in ’n nuwe dokumentêr oor die lewe van die swart tennislegende Arthur Ashe waarin iemand hom vra of hy hom ooit vererg het vir die tirades en uitbarstings van John McEnroe.

“Ja,” antwoord Ashe, wat bekend was vir sy rustige uitstraling op die tennisbaan, “maar ek was meer jaloers op wat dit beteken het. McEnroe (as wit man) het die emosionele vryheid gehad om hom sleg te gedra.”

Twee dekades later, toe Serena Williams en haar suster Venus op die tennistoneel bars, moes hulle op die harde manier leer dat min verander het sedert die dae van Ashe en dat daar steeds ’n aaklige dubbele standaard heers. Nie net ten opsigte van ras – soos Ashe ervaar het nie – maar ook van geslag...