Dalk red Kyrgios nog die aarde … of iets

EK lees nou die dag Australiese wetenskaplikes werk aan ’n projek om die Tasmaanse tier, ’n lelike uitgestorwe dierasie, te herskep met die DNS van ’n hedendaagse buidelmuis, en, as ek reg onthou, die onbeskofte Aussie-tennisknaap Nick Kyrgios.

Kyrgios, vir dié wat nie weet nie, is al meer kere beboet vir sy aanganerye as enige ander speler. Hy skel en skree tydens sy wedstryde op skeidsregters, lynregters, baljoggies, sy afrigter en die toeskouers – selfs sy eie juigkommando.

Die Tasmaanse tier was ’n buideldier. Ek weet min van hierdie goed, so die eerste prentjie in my kop was van ’n tipe kangaroe, maar met gevaarliker tande. Toe nie. Hierdie outjie was heelwat meer eksoties...