KITSKENNIS | Die goudprys: Dink jy in dollars, of dink jy in baked beans?

Wat is die prys van goud deesdae?

DIS nie ’n eenvoudige vraag om te antwoord nie, want watter maatstaf gebruik ’n mens vir iets wat oral ter wêreld waarde het en self ook ’n betaalmiddel is? En in watter vorm meet jy dit, byvoorbeeld gegiet in stawe of in ’n verwerkte munt soos die Krugerrand? (Die prys wissel ook elke minuut van die dag tussen verskillende wêreldmarkte, maar dit daar gelaat).

Die algemeenste maatstaf in gebruik is die prys per fynons (gewig), in Amerikaanse dollar. So, gemeet in dollar was die prys van goud in (sê nou maar) 1995 minder as $400 per fynons. Ná die globale finansiële krisis van 2007 en 2008 (en daarna) het die prys kwaai geklim tot by meer as $1,000 per fynons in 2009, meer as $1,400 in 2010 en meer as $1,600 in 2012 (en tussendeur natuurlik heeltyd op en af). Met die skryf hiervan was die prys laer as in 2012 op net meer as $1,473 per fynons (https://goldprice.org/live-gold-price.html)...