VSA: Die Rooi Gevaar is op ons

’N AMERIKAANSE kennis vertel met groot oë vir my, wetende ek is ’n Suid-Afrikaanse expat, dat hulle finansiële direkteur by ’n groot Amerikaanse maatskappy nou die dag ’n ou, verslete Zimbabwiese 100-triljoen-dollarnoot op ’n bestuursvergadering rondgeswaai het met dié waarskuwing aan die oorblufte kollegas om die tafel: “Dís wat sosialisme aan ’n land doen. ’n Ou Zimbabwiese geldnoot soos dié (40 Amerikaanse sent werd) waarmee jy nie eens ’n brood kan koop nie. Is dit wat julle wil hê?!”

Genade. ’n Stem vir die Demokratiese presidentskandidaat, Joe Biden, en sy vise-presidentskandidaat, Kamala Harris, is ’n stem vir sosialisme? Die feit dat Biden pres. Donald Trump se massiewe belastingverligting aan die rykes wil terugvat en mense wat meer as $400 000 per jaar verdien swaarder gaan belas, is genoeg rede om weer vir Trump te stem en Amerika te red van ’n sosialistiese toekoms!

Of so wil Biden se kritici die kiesers laat glo...