Mosambiekse mag: Ons gaan soos die flentergatte lyk

BURGERMAGLEDE is tot op Twitter opgeroep sodat die weermag stewels op die grond kon kry om die polisie te help om die geweld en plundering in KwaZulu-Natal en Gauteng in bedwang te kry. Die weermag het eenvoudig nie die 25,000 soldate beskikbaar gehad wat tot 12 Augustus met dié doel ontplooi is nie.

Met ons vredesverpligting teenoor die Verenigde Nasies in die Demokratiese Republiek van die Kongo en 2,800 soldate wat moet grenspatrollies doen, was die grootste gedeelte van die gevegsmag reeds toegedeel.

Die veiligheidsmagte is met die spreekwoordelike broek op die knieë gevang met die pas afgelope geweld, het Nosiviwe Mapisa-Nqakula, die minster van verdediging, op televisie erken. En nou is dieselfde broek om die enkels met ons ontplooiing in Mosambiek. Dié ontplooiing, van 15 Julie tot 15 Oktober, is 'n internasionale verpligting teenoor die Suider-Afrikaanse Ontwikkelingsgemeenskap (SAOG), wat terrorisme en ekstremistiese geweld in die noordelike Cabo Delgado-provinsie met 'n ingrypingsmag bestaande uit onder andere Suid-Afrika, Botswana, Angola en Tanzanië wil hokslaan. ..