Afrika se eerste Winterspele kan iets ys-liks wees

EK sê sneeuwit wêreld, maar daar was hierdie jaar feitlik boggerôl sneeu by die ski-oord buite Beijing waar die Spele aangebied is. Vir China was die afgelope jaar die warmste op rekord, met die gemiddelde temperatuur hoër as 10˚C. As jy die agtergrond (https://earthobservatory.nasa.gov/images/149430/a-satellite-view-of-olympic-terrain) in die TV-uitsendings mooi dopgehou het, kon jy soms een of ander verskriklike lelike kragstasie sien, of sulke treurige boompies met nie ’n druppel sneeu daarop nie.

Maar dis nou een ding van die “Middel-koninkryk”; hulle kan goed bou en maak gebeur, maak nie saak of hulle 1.5 miljoen inwoners moet verskuif om Olimpiese infrastruktuur te bou nie. Die Chinese betwis die syfers, maar dit is hoeveel mense verskuif is vir die bou van 2008 se Olimpiese Spele, volgens die Centre on Housing Rights and Evictions (COIHRE) in Genève, Switserland.

China sê issie, dit was net so 6,000 mense. Die Chinese het darem die “Bird’s Nest”- stadion, wat vir die 2008-Spele gebou is, weer vir vanjaar se openingseremonie gebruik; so alles is darem nie van nuuts af gebou nie. Een van die Chinese regering se grootste kritici, die kunstenaar Ai Wei Wei, het terloops gehelp met die ontwerp van die Bird’s Nest...