‘Glo my tog net, ek is ’n Vlakplaas-massamoordenaar’

WIE het ooit kon droom dat drie dekades nadat Vrye Weekblad die woorde “Ek was in die hart van die hoer” op sy voorblad uitgebulder het, ek steeds oor Dirk Coetzee sou skryf?

’n Massamoordenaar, ’n skobbejak. En, toe ek hom leer ken het, ’n werklose niksnuts. My woordeboek het nie genoeg sinonieme om geregtigheid te laat geskied aan dié gewese bevelvoerder van die apartheidspolisie se moordbende op Vlakplaas nie.

Hy is begrawe in die skande-akker van ons geskiedenis saam met ander skobbejakke en politieke melaatses soos Magnus Malan, PW Botha, Louis le Grange en Jimmy Kruger. Hy sal waarskynlik veral onthou word vir hoe hy en sy handlangers die liggame van hul slagoffers op motorbande verbrand het terwyl hulle brandewyn-en-Coke gedrink en vleis gebraai het...