Roe vs. Wade: ’n Amerikaanse hoeksteen wankel

DALK moet ons hier in Suid-Afrika liewer stilbly oor ander mense se probleme, maar aan die ander kant is ons óók dieper in die moeilikheid sonder die VSA se voorbeeld van ’n oop samelewing met persoonlike vryhede waar die staat aan dieselfde duidelike stel reëls as gewone landsburgers onderworpe is.

In elk geval is die strydpunte baie dieselfde daar as hier by ons, weliswaar met ’n graadverskil: maatskaplike verdeeldheid, ekonomiese agteruitgang, wantroue in die staat, populistiese leiers wat hul eie korttermynbelange voorop stel. Die VSA het sy eie weergawe van misdaad en wetteloosheid wat erger word; van mal mense met gewere wat in skole of winkelsentrums aan die skiet gaan. Oor alles hang die vrees dat ’n snel veranderende klimaat besig is om die oorhand oor ons almal te kry.

En net soos hier by ons wonder mense aan alle kante van die politieke spektrum of die waardes van ’n veelparty-demokrasie en die oppergesag van die reg hoegenaamd nog die beste manier is om die pad vorentoe te stap...