AS dit nie was dat die Nazi’s, soos dit goeie fasciste betaam, elkeen van hulle hoogs geheime geënkripteerde boodskappe met ’n totaal onnodige verering van die Führer afgesluit het nie, sou die Britte dalk nooit ’n vinniger manier ontdek het om die Enigma-masjien se kodes te ontwar nie.

Die span by Bletchley Park, onder wie die geniale Alan Turing en Gordon Welchman, het besef dat die woorde “Heil Hitler” onderaan elkeen van die Duitsers se boodskappe as ’n sleutel kon dien in die stryd om Enigma-boodskappe betyds te ontsyfer voordat die masjien se enkripsie elke 24 uur nogmaals sou verander.

Die ander insig (dit was waarskynlik Turing s’n) was dat Enigma nooit ’n letter geënkodeer het as homself nie – ’n S sou altyd een van die ander 25 letters van die alfabet word en nooit ’n S bly nie. Dat dít die moontlike oplossings vir elke geënkripteerde letter van 1 uit 26 tot 1 uit 25 afgebring het, het ’n drastiese verskil gemaak aan die tyd wat nodig was om die kodes te ontsyfer...