Dis tyd vir ’n skietstilstand in Oekraïne

EK het nogal ’n obsessie met die oorlog in Oekraïne. Dis seker deels omdat ek al tyd in Rusland en Oekraïne deurgebring het en nog mense daar ken, maar ek dink dit is meer omdat ek besef dat die oorlog die wêreld waarin ek en my kinders leef, beduidend kan verander, dalk selfs globalisering kan omkeer.

Vandag is ek nogal bang dat ons, die mense wat nie regstreeks by die konflik betrokke is nie, moeg gaan raak en belangstelling in die oorlog gaan verloor. Die media se dekking van die oorlog is klaar op ’n veel laer vlak en nou begin dit lyk asof sommige Westerse lande op die punt staan om vir Volodymyr Zelensky en Vladimir Putin te sê: Ag toe nou kêrels, hou nou op met julle nonsens, julle maak die lewe vir ons almal ongemaklik.

Die diplomatieke ghoeroe uit die Koue Oorlog-era Henry Kissinger het juis laas week in Davos verklaar dat Oekraïne vrede moet koop deur van sy grondgebied af te staan...