Die dag kom dat ons almal vir Eskom kan help om beurtkrag stop te sit

KOM ons kry eers al die pols-kouery agter die rug: Ons kry dit deesdae nie meer so dikwels reg om genoeg elektrisiteit op te wek om die land se ekonomie net aan die gang te hou nie, laat staan nog genoeg om dit te laat groei sodat ons kan werk skep vir ’n massa mense wat ál verder in hopeloosheid wegsink.

Die grootste rede hiervoor is dat die meeste van ons elektrisiteit van Eskom se vloot steenkoolaangedrewe kragstasies kom, en die meeste van dié is oor die muur of sukkel om behoorlik aan die gang te kom. Wanneer hulle wel werk, is die verbranding van steenkool ’n morsige proses waarvan omtrent almal graag die einde wil sien. In elk geval is dit deesdae feitlik onmoontlik om verdere finansiering vir steenkoolkrag te kry.

So 10% van ons elektrisiteit kom van kernkrag in die vorm van Koeberg, maar dié is ook al lank in die land en gaan ook ’n groot klomp geld vat om aan die gang te hou. Nuwe kerntegnologie bied opwindende moontlikhede, maar dan sal ons eers heelwat verlore kundigheid en kapitaal na die land moet teruglok...