Spesiale verslag | Verpleegdienste op die rand van ’n afgrond

SELFS onmiddellike en drastiese ingryping – waarvan daar nog geen sprake is nie – gaan nie ’n ramp kan afweer nie, dalk net die omvang daarvan beperk. Teen 2030 sál baie van Suid-Afrika se staatshospitale leeg staan of dalk deur plakkers bewoon word. In dié wat nog in gebruik is, sal donker sale met leë en ongebruikte beddens ’n algemene gesig wees.

Privaat hospitale – as hulle teen daardie tyd nie reeds deur die mislukkende nasionale gesondheidsversekeringstelsel (NGV) verswelg is nie – sal oorvol wees, met geen kans op uitbreiding nie. Pasiënte se veiligheid, wat nou reeds in baie staatshospitale in die gedrang is, sal onder selfs groter druk wees. Nog meer en groter eise weens nalatigheid, wat reeds enorm is en in sommige provinsies op pad is om die provinsiale gesondheidsbegroting te oorskry, sal volg.

Die onvermydelike werklikheid is dat Suid-Afrika afstuur op ’n tekort aan tussen 131 000 en 162 000 verpleegkundiges binne die volgende agt jaar...