Gaan iemand oplaas The Cat se tjank kan aftrap?

MABUZA het glo na homself as The Cat begin verwys nadat hy in 2015 ’n vermeende poging om hom te vergiftig oorleef het, maar dit kan net sowel wees oor sy vinnige voetwerk in die skadu’s en agter die skerms.

Die lys van bewerings teen Mabuza is lank, maar dis selde dat iets teen hom bewys kan word of dat hy enige prys daarvoor betaal. Trouens, as ons weer sien, is hy in ’n selfs invloedryker posisie as tevore. So byvoorbeeld is hy destyds deur premier Mathews Phosa afgedank as Mpumalanga se LUR vir onderwys nadat die provinsie se matriekslaagsyfer van 51% tot 71% opgeblaas is, maar ná die daaropvolgende verkiesing was hy terug as LUR vir behuising onder premier Ndaweni Mahlangu.

Mabuza se naam word omtrent altyd in dieselfde asem genoem as die tenderbedrog met die Mbombela-stadion vir 2010 se Sokkerwêreldbekertoernooi, en selfs wanneer politieke moorde en ’n sluipmoord op ’n fluitjieblaser ter sprake kom. En dan was daar die vrae oor die beweerde R14 miljoen kontant wat glo ’n jaar voor die sokkertoernooi op Mabuza se plaas buite Barberton gesteel is, maar waarvan ook niks gekom het nie...

DEEL