Wie is Bonnie Raitt?

IN die Londense koerant Daily Mail het ’n groot opskrif dit begin Februarie uitgebasuin: Onbekende sangeres raap Grammy voor die neus van Beyoncé weg.

Daardie “onbekende” sangeres is Bonnie Raitt. ’n Mens sit ’n oomblik verslae en dink. Ná so ’n opskrif is jou ewewig versteur. Natuurlik is daar altyd ’n buitekans dat ’n onbekende persoon iets wen – maar in die konteks van die Grammys? Goed, die verslaggewer moet bloedjonk wees. Foeitog. Jeugdige hubris en onnoselheid, ’n dodelike kombinasie.

Maar is dit nie die onderliggende aard van populêre musiek nie – dat bekendes vinniger onbekend raak as hul musiek? Met die hele bedryf besig om in nuwe bane wedergebore te word ná Covid, en konserte die enigste manier is vir kunstenaars om skatryk te word uit hul musiek, laat Bonnie Raitt se Grammy vir die beste liedjie van 2022 ’n mens besef dat daar nog iets inherent goeds is in die bedryf...