SA standpunt oor Oekraïne: Hoekom en waarom?

EK het kennis geneem van Dee Krüger se standpunt (https://www.vryeweekblad.com/menings-en-debat/2022-04-28-oekrane-gn-twee-kante-aan-hierdie-grusame-ongevraagde-oorlog-nie/) in Vrye Weekblad wat, soos te verwagte was, ’n sterk Westerse siening verteenwoordig. Ek sal poog om met verwysing na Suid-Afrika se standpunt oor die oorlog aan te voer dat daar dwarsoor die wêreld ’n ander, gedifferensieerde mening oor Oekraïne gehuldig word, met ’n effe ander aanslag as dié van die Weste.

SA beleidsoorwegings

In my Rapport-artikel het ek probeer om Suid-Afrika se standpunt met betrekking tot Oekraïne toe te lig deur daarop te wys dat die tradisionele noue bande en solidariteit tussen die ANC en Rusland steeds ’n belangrike en beduidende faktor bly. Ek het hierdie sterk band self gesien tydens ’n besoek saam met Madiba aan Moskou in 1998 toe hy en pres. Boris Yeltsin mekaar met deernis omhels het met die ondertekening van die omvattende strategiese vennootskap tussen Rusland en Suid-Afrika...