Askies dat ek jou nie R10,66 kan tip nie, so hoe lyk dit met R20?

EK vermoed Jonathan, my gereelde vulstasiekonsultant, verstaan die ineengestrengelde wêreld van lojaliteitskaarte, betaal-apps en krediet- en debietkaarte beter as die meeste bankbestuurders (ás daar nog bankbestuurders is).

Jonathan het ’n tydjie terug reeds besef hy sal moet ingryp as hy steeds ’n tip wil verdien elke keer as hy my kar volmaak. Dis nie dat ek ongeneë is om hom te vergoed nie – inteendeel, ek dink dis wonderlik dat die mense wat oor sulke dinge besluit steeds volhard met die pragtige Suid-Afrikaanse tradisie van die pompjoggie. (Ek dink “pompjoggie” is ná “vakhoof” die beste posbenaming wat enige mens kan hoop om te hê).

Daarom vergoed ek graag pompjoggies vir hulle dienste. Die probleem is dat ek nie altyd weet hóé om dit te doen nie, want kontant is deesdae nogal 'n rariteit in my bestaan...