Oor jakopoekers en hoenderverdriet

VANDAG vat ons boeke met Annerlike Afrikaans. Ons taal het vele wonings en sy dra vele rokkies en geen borstrok kan haar beteuel nie. Die annerlikheid is ’n vars bries wat deur Afrikaans waai, sodat haar asem nie benoud raak nie. Hierdie woordeboek deur Anton F. Prinsloo teken Afrikaanse kontreitaal op.

Ons land is groot en wyd en niks is standaard nie. Normaal is net ’n siklus van die wasmasjien. In die voorwoord noem Prinsloo dat kontreitaal aan die uitsterf is en dat dialekte van ’n taal geensins minderwaardig is aan die standaardvariëteit nie. Die boek bevat uitdrukkings in Griekwa-Afrikaans, asook 700 ander kontreie. In sekere streke verstaan inkommers dikwels glad nie waaroor ’n gesprek gaan nie.

So word “aborsie” in Griekwaland-Wes “aamborsie” genoem...