Spesiale verslag | Die anatomie van ’n mislukte munisipaliteit

KOMANI is nie die mees neerdrukkende dorp in die Oos-Kaap waar ek al ooit was nie (daardie prys gee ek aan Middelburg, Molteno en Jamestown).

Hier, in die ou Queenstown, is daar darem nog dinge wat werk. Topskole, ’n nywerheidsgebied met fabrieke wat duisende werksgeleenthede skep en ’n stadskern wat die ekonomiese hartklop is vir die groter Chris Hani-distrik, wat dorpe soos Cradock, Middelburg, Tarkastad, Molteno, Hofmeyr, Cacadu, Dordrecht, Indwe, Cofimvaba, Tsomo, Cala, Khowa en Engcobo insluit.

As jy op ’n lomerige Saterdagmiddag deur Toptown sou ry, soos ek die afgelope week gedoen het, sou jy verskoon kon word as jy gedink het dat die mooi huise en tuine, netjiese sypaadjies en die indrukwekkende geboue en gemanikuurde sportvelde van Queen’s College en Girls’ High dié van ’n florerende plattelandse dorp is...