Ali van Wyk | Cyril roep die boere in
RW JOHNSON, die politieke kommentator wat deur radikale linkses gehaat word (en ja, sy gemymer is soms so polities onsensitief dit laat jou ineenkrimp), klink deesdae verbasend positief oor Suid-Afrika.
Min het dit sien kom, want Johnson se voorspellings oor hoe ver die land die moeilikheid in sou vaar, was ’n dekade gelede op 'n apokaliptiese vlak in ’n boek soos South Africa’s Brave New World. Ook toe is sy opinies verguis. Maar byna als het waar geword.
Deesdae sê hy die einde van die ANC, selfs as dit net die begin van die einde is, móét as goeie nuus gesien word, al weet ons nie waarmee die ANC vervang gaan word nie. Selfs al staar ons ’n onbepaalde tydperk van onstabiliteit in die gesig.
Hy reken ons kan seker daarvan wees die regering sal gaandeweg stukkie vir stukkie van die land se infrastruktuur, regeringsdienste en staatsmaatskappye privatiseer en verkoop, omdat hulle nie ’n keuse sal hê onder die geweldige druk om die ekonomie aan die gang te hou nie. Trouens, die proses het so stilweg al ’n hele ent met die pad af gevorder.
As indrukwekkend suksesvolle uitvoerbedrywe en werkgewers soos die sagtevrugte- en die sitrusbedrywe nie hulle vrugte by die hawens en deur die hawens kan kry nie, sal stukke spoorlyn en dele van die hawens, en selfs paaie, op die een of ander manier aan maatskappye oorhandig word om te bestuur.
Selfs al het Gwede Mantashe soos ’n neet probeer vasklou aan ’n steenkool-aangedrewe kragnetwerk, moes president Cyril Ramaphosa uiteindelik self toesien dat die bodproses vir hernubare energiebronne heropen word. Daar is baie voorbeelde.
Dit is bykans ondenkbaar dat die grootste Sondagkoerant in Suid-Afrika, die Sunday Times, net tien jaar gelede ’n voorbladstorie sou publiseer wat die adjunkpresident, Paul Mashatile, aanhaal dat die regering bekende konserwatiewe en hoofsaaklik wit organisasies soos Solidariteit en Afriforum, ander burgerregte-organisasies, en boere oor die algemeen, gaan vra om honderde verwaarloosde en gekrokte watersuiweringsaanlegte te help regmaak.
Ja, dit kan net verkiesingspraatjies wees, en dis nie ’n amptelike aankondiging nie. Ons weet ook hy sal eers die idee verby die ideologies-verstokte en beheersugtige sikofante in sy party moet kry, maar dit is nie ’n voorstel wat van Afriforum of die boere se kant af kom nie. Dis leiers in die nasionale regering wat onder baie groot druk is wat uitreik na mense wat nie vir hulle gestem het nie. Dit is mense wat besef dat ’n volskaalse waterkrisis oneindig meer moeilikheid kan veroorsaak as 'n elektrisiteitskrisis.
Dit moet as ’n positiewe stap gesien word.
Om kommentaar te lewer op hierdie artikel, registreer (dis vinnig en gratis) of meld aan.
Lees eers Vrye Weekblad se Kommentaarbeleid voor jy kommentaar lewer.