ARGIEF | Brekfis in-die-bed

LAAS Sondagoggend was die somer verby. Dis herfs, en strandstap hou niks meer bekoring in nie. Ons sprei liewe vriendin Renee se enorme seegroen sybokhaarkombers oor die bed, en dra die resepte aan haar nagedagtenis op.

Nou begin die dae vir ontbyt in die bed. Jy leun terug teen die spierwit kussings wat jou oumagrootjie met die hand omboor het, neem ’n slukkie Earl Grey uit ’n Minton-koppie, en wag dat iemand die bamboesskinkbord met sy fyn lappie inbring. Daarop is ’n saggekookte eier, roosterbrood, vars lemoensap en dieprooi deurskynende kweperkonfyt (landbouskougehalte).

Brekfis wat iemand vir jou in die bed bring, is salig. Eweneens is omtrent niks so troosteloos soos wanneer jy self moet opstaan om te gaan Marmite-toast maak en dit op ’n ou gekraakte hotelbord bed toe bring nie...

Deel