Tito: Die stange van bevrydingspolitiek striem dié karperd

DIE minister bestuur die fiskale beleid van die staat en die regering, maar sy besluite word geneem in die konteks van 'n politieke agenda wat deur die uitvoerende gesag, met spesifieke verwysing na die president, gekarteer word.

Vir Tito Mboweni, avokadoboer van Tzaneen wat eens as die goewerneur van die reserwebank gedien het, sit so 'n tegnokratiese pligstaat as minister van finansies ietwat ongemaklik. 'n Boer neem besluite wat hy verreken teen risiko’s in 'n markekonomie terwyl 'n goewerneur monetêre beleid onafhanklik van die uitvoerende gesag bepaal.  

Mboweni is 'n karperd met 'n sterk kop, maar die disselboom en stange van bevrydingspolitiek striem sy beweegruimte, en druis in teen sy ongebreidelde natuur om moeilike besluite berekend te neem en deur te forseer. Mboweni het reeds verskeie kere sy Twitter-rekening gebruik om die waters vir onpopulêre beleidsbesluite te toets. Om die waarheid te sê, dit wat hy op Twitter kwytraak, het hom al meermale die argwaan van Luthuli-huis op die hals gehaal omdat sy politiek-ekonomiese pragmatisme die dogma en rigiditeit van kollektiewe besluitneming uitdaag...

Deel