‘Ons moet kopskuiwe maak: oor skoolvakke, onderwysers én Afrikaans ...’

MY gesprek met prof. Michael le Cordeur, hoof van kurrikulumstudies in die departement van onderwys aan die Universiteit van Stellenbosch, begin met 'n staaltjie oor 'n grassnyer wat met petrol werk, en 'n jong seun wat 'n gaping kan sien.

“Gister is daar hierdie outjie wat my buurman se gras sny tydens beurtkrag. Hy dra sy eie masjien op sy skouer en hy loop van huis tot huis. Hy sê vir my, Meneer, jou gras het ook 'n lekker cut nodig. Ek het jou buurman R150 gevra, maar vir jou sal ek R100 vra. En voor ek nog ja of nee kan sê, sny hy my gras. 

“En ek dink so by myself: daai man gaan elke aand R350 in sy sak hê, maar op pad huis toe gaan hy by die poskantoor verby stap waar 'n klomp mense staan en wag vir hul R350 se maandelikse aalmoes. Hulle gaan R350 hê vir die hele maand, terwyl dié outjie, net omdat hy 'n bietjie entrepreneursvaardighede het, en gewillig is om bietjie te werk, elke dág R350 verdien. Vermenigvuldig dit met 30, kyk waar kom hy uit."..